The Beginnig Of The End | بدايه النهايه

- " انت رجعت ؟؟!!"

- " ايوه "

- " طيب .. علي ما تاخد دوش هيكون الغدا خلص "

كان هوه ده الكلام اللي علي طول بيدور بينهم

ماكانش بيزيد عن كده ابدَا

المفروض ان الاتنين دول متجوزين عن حب

كانت قصه حب الناس بتتحاكي بيها دايما

حب من ايام الجامعه

الحياه ابتدت تتغير و تتشقلب من ساعه ما جالهم خبر انهم مش هيعرفوا يخلفوا

بسبب عقمهم هما الاتنين

يعني حتي ما ينفعش حد فيهم يتجوز و يعيش حياه سعيده لوحده

اتكتب علي البيت اللي ابتديت فيه اجمل قصه حب بينهم انه يبقي بيت كئيب

اختفت منه السعاده و كل حاجه جميله

كتير اوي كانت بتتكلم معاه في موضوع انها تشتغل

بس هوه كان رافض جدًا

لانه كان مقتنع ان الست مالهاش غير بيتها و جوزها و عيالها

كانت كل ما تسمع الجمله دي تعيط و تقوله

- " مانت عارف ان مفيش عيال "

يصرخ في وشها و يقولها

- " دي بقت عيشه تقصر العمر "

و يسيب البيت و يرزع باب الشقه في وشها

الحياه بقت مستحيله ما بينهم

كل شويه تحصل بينهم الخناقات دي و يسيبلها البيت و ينزل يقضي اليوم بره مع اصحابه

و يسيبها هي متعذبه و غرقانه في دموعها في البيت

كتير اوي بتقوله

- " طب مادام انت مش طايقني كده .. و انا مش عجباك .. ماتطلقني و ترتاح "

- " انا مش قلتلك 100 مره مش عايز اسمع سيره الموضوع ده تاني .. اخرسي خالص "

لحد ما هي خلاص مابقتش عارفه تعمل ايه

احيانًا بتفكر تخلعه

لكن لسه من جواها بتحبه

و كفايه عليها انه في اخر اليوم بيكون معاها في البيت

علي الاقل بتحس بنفسه جنبها وهي نايمه

بس هي خلاص مابقتش عارفه تعمل ايه

الفراغ بقي بيقتلها

و الحرمان من كل حاجه جميله في الدنيا ابتدي يعذب فيها

بدات تدخل ع النت .. تكلم شباب ماتعرفهمش

بدات تكذب ع الناس و علي نفسها

بدات تتعرف ع ناس حقيره

و تتكلم معاهم

عملت لنفسها عالم تاني تلاقي فيه متعتها و حياتها بعيد عن قرف البيت و حياتها المستحيله مع جوزها

اتوطدت العلاقه بينها و بين واحد من ع النت

ابتدوا يتكلموا كتير و يقربوا من بعض

و يبعتوا صورهم لبعض

لحد ما طلب انه يقابلها و انه عايز يشوفها

قابلها و قعدوا يتكلموا في مكان عام

ابتدي يمد ايده عليها و عايز يلمسها

اول ما لمسها حست انها فعلا مبسوطه ماعترضتش

لكن لما هو اتمادي فجاه حست ان ماينفعش اللي بيحصل ده

و حست انها اللي بتعمله ده حرام و انها بتظلم نفسها

انفجرت في العياط و روحت ع بيتها

و استغفرت ربنا ع اللي عملته ده و كرهت نفسها جدًا

دي كمان كرهت جوزها عشان هوه السبب في انه سايبها تدمر نفسها

حست انها لازم تنتقم و تاخد حقها

كلمت جوزها في التليفون

- " عايز تاكل ايه النهارده ع الغدا ؟ "

- " بصراحه انا نفسي في مكرونه بالبشاميل "

- " خلاص ان شاء الله اول ما تيجي هتلاقيها جاهزه "

قفلت التليفون و نزلت الشارع

اشترت سم فران

و ابتدت تعمل البشاميل و حطت فيه كل كميه السم اللي اشتريتها

في نفس الوقت جوزها كان بيفتح مواقع الجنس اللي هوه كان متعود يدخل عليها

لقي صور جديده نزلت

لقاها صور لمراته

طبعا الصدمه كانت جامده عليه

و معرفش يعمل ايه

بس كل اللي فكر فيه انه لازم ينتقم لنفسه

ان شاء الله حتي يموتها عشان تموت و معاها فضيحتها

اتكلم مع واحد صاحبه صيدلي

اداه اسم دواء معين

لو اتاخد اكتر من الكميه الطبيعه بتاعته هيبقي مفعوله زي السم بالظبط

و راح طالع ع بيته

لقاها قاعده بتتفرج ع التليفزيون

قالتله

- " ايه ده انت اللي جابك بدري كده "

- "بصراحه كنت جعان اوي .. و قلت اجي الحق الصينيه و هي سخنه "

- " قالتله هي خلاص الصينيه في الفرن .. علي ما تاخد دوش تكون استوت و ناكل "

كانت بتتمني الوقت يعدي بسرعه عشان تخلص منه

كانت بتعد الثواني عشان تشوف اللحظه اللي هو بيتالم فيها و تشوفه و هوه بيتعذب

عشان يحس بجزء من العذاب اللي هي شافته

و هي في نفس الوقت هتموت معاه

هي كمان اصلًا كانت كارهه حياتها بعض اللي حصل

بس ع الاقل كانت عايزه تشوف نظره الالم في عينيه قبل ماتموت

هوه كمان كان عايز يقتلها و عايز يموتها عشان الفضيحه اللي هي عملتها

كان بيعد الثواني عشان يخلص منها

خرج من الحمام

لقاها بتحضر السفره

قالها

- " نفسي فيها اوي بجد "

- " اديك هتاكلها اهوه "

- " هوه احنا عندنا عصير في الثلاجه ؟؟ "

- " اه تقريبا .. هتلاقي في الباب "

دخل المطبخ .. طلع كوبيتين

حط في الاتنين تلج

و حط في واحده منهم كل الدواء اللي كان معاه

و ملاهم الاتنين عصير

حط الكبايه اللي فيها الدواء قدامها

ابتدت تحوطه في الطبق اللي قدامه الاكل

و حطت لنفسها

قعد ياكل بشراهه فظيعه

كان بيحوط همه في الاكل لحد ما هي تشرب العصير و يشوفها و هي بتتالم عشان يصراحها بفضيحتها

ابتسمت قوي و هي شايفاه بياكل بشهيه

و قعدت تشرب العصير و تتفرج عليه

قالها

- " انت ما بتاكليش ليه "

- " هاكل .. بس بحب اتفرج عليك و انت بتاكل .. هي للدرجه دي عجباك ؟؟ "

- " تحفه بجد .. تسلم ايدك "

خلصت العصير كله و قعدت تضحك بطريه هستيريه

هوه كمان ابتسم لما شافها خلصت العصير

و قالها

- " انتي بتضحكي عليه ايه ؟؟ "

- " لا اصل المكرونه اللي انت كلتها دي فيها سم "

بصلها كده بدهشه

و فجاه انفجر هوه كمان في الضحك

سالته و هي مش قادره خلاص هتموت من الضحك

- " امال انت بتضحك ليه قوي كده ؟؟ "

- " اصل العصير اللي انت كمان شربتيه فيه سم "

اتخضت هي كمان للحظه كده

و بعدين قعدت هي كمان تضحك

و انفجروا الاتنين من الضحك

لحد ابتدي يبان الالم علي وشهم

و في ثانيه وقعوا هما الاتنين ع الارض

و اختفي الضحك و الالم

و اختفت كل حاجه تانيه

تمت

******************
أحمد صبري

27\o9\o1o

Purple Flowers

- "مالك" ؟

- "لا عادي مفيش حاجه .. بس حاسه اني مخنوقه شويه" .

- " من ايه بس يا حبيبي " ؟

- " معرفش قفشت فجاه كده" .

- " تقفشي برضه و حبيبك معاكي ؟ .. ينفع كده ؟؟ "

- " معلش .. انا هبقي كويسه .. متقلقش انت بس !! "

كان هذا الحوار في طريق عودتهم من الكليه .. بعد قضاء يوم صعب و طويل

- " طب هشوفك بالليل ان شاء الله ؟؟ "

- " مظنش .. انا تعبانه و مش قادره انزل .. انا ما هصدق اروح البيت اصلا !! "

- " طب اوك يا حبيبي .. براحتك .. هكلمك في البيت كمان شويه .. رنيلي لما توصلي "

" اوك .. سلام "

" سلام يا حبيبي .. هتوحشيني "

لم يكن يدري لماذا لم تعد تحبه و تبادله نفس المشاعر .. لم يعد يفهم اي شيء

هل هي مازالت تحبه ام لا ؟؟

هل شعرت بالملل منه ؟؟

هل بدات تشعر بالانجذاب نحو شخص اخر غيره ؟؟

اخذت تلك التساؤلات تسبح في خياله الالاف المرات

فهو يعشقها .. و لا يستطيع ان يتخيل نفسه مع احد غيرها

ولا يستطيع العيش بدون ان يري وجهها الجميل

فهي حياته .. و هي الهواء و الماء بالنسبه اليه

انها هي القمر الذي يضيء لياليه

انها هي الشمس التي تشعره بالامان و الدفيء

و لكن ماذا يفعل ؟؟

ايذهب اليها و يسالها عن ماذا يجول بخاطرها ؟؟

و لكنه يدري اذا فعل ذلك سوف يسوء الوضع

و سوف تتحول المشكله الصغيره الي مشاجره عنيفه

قد تنهي جميع ما بينهم في لحظه غضب

و لكنه قرر شيء اخر

ذهب الي منزله .. و استحم .. و ارتدي افضل ما عنده من ملابس

ليصبح في افضل صوره

ذهب الي بائع الزهور و اشتري باقه زهور من اللون الارجواني

فهذا اللون تعشقه محبوبته

و ذهب اللي البنايه التي تسكن بها

ووقف امام البنايه .. و اخرج جواله من جيبه

و اخذ يتصل بها

لم ترد عليه من اول مره

و لكنه لم يستسلم

و عاود الاتصال بضع مرات حتي اجابت

- " ايه يا حبيتي مش بترودي ليه "

- " معلش الموبايل كان معمول سايلنت و انا مسمعتوش "

- " طب ممكن بس .. تبوصي من البلكونه ثانيه بس "

- " ليه .. فيه حاجه ؟؟ "

- " اطلعي بس .. عشان خاطري !! "

- " اوك "

و عندما نظرت من الشرفه و وجدته

- " ايه ده !!! .. ايه اللي انت عامله ده يا مجنون ؟؟!! "

- " دي اقل حاجه اقدر اعملها للانسانه اللي مالكه قلبي و عقلي و كل حاجه فيها "

- " أ .. أ "

- " تفتكري اني هقدر اسيب الملاك ده زعلان لحظه واحده .. مينفعش .. امال انا بقي لازمتي ايه في حياتك "

" بقولك ايه احنا هنقضيها كلام في التليفون .. انا مستلف تلات جينيه و اقربه يخلصوا .. انزلي بقي !!! "

دخلت الي غرفتها و ارتدت ملابسها

كان شعرها الاسود متطاير خلفها و هي تنزل درجات السلم مسرعه

كأن الهواء لم يستطع ان يقاوم جمالها فاخد يطير متباعدا عنها

و لما شاهدها امام عينيه

- " كل ثانيه بحسك اجمل و ارق .. انا بجد ربنا رزقني باجمل ملاك عشان اكون بين ايديه "

" انا لو كان اقدر كنت جبتلك الدنيا كلها معايا .. بس انا دنيتي كلها بين ايديكي انتي "

لم تستطبع الرد عليه .. فكانت في حاله لم تشعر بها من قبل

اخذت منه باقه الزهور و لم تستطع ان تقول سواء

- " انا بجد بعشق اللون ده "

- " انا بعشقك انتي .. و بعشق كل حاجه انتي بتعشقيها "

اخذت تستنشق رائحه الزهور .. و كانها تحاول ان تخفي خجلها منه و قالت

- " طب احنا هنفضل كده في الشارع ؟؟ .. تعالي نروح اي حتا .. تحب تروح فين ؟؟ !!! "

- " اي مكان يا حبيبه قلبي .. اهم حاجه بس انك تكوني قدام عينيا "

ذهبوا الي احد المطاعم .. و جلس امامها .. و لم يتكلم

فقد كان ينظر اليها فقط .. و كانها يراها للمره الاولي

كانت اجمل النساء في عيناه

منذ ان عرفها لم يستطع ان ينظر الي اي واحده غيرها

فكانت هي معني الجمال بالنسبه له

كانت هي نصفه الاخر الذي كان يبحث عنه كثيرا

قالت له

- " انت هتفضل ساكت كده كتير ؟؟ "

- " كنتي وحشاني قوي .. بجد حاسس اني مشوفتكيش من زمان .. و مش مصدق انك قدام عينيا دلوقتي .. انا حاسس اني بحلم "

- " لا انت مبتحلمش .. انا قدامك اهوة "

- " مش عارف اقول اي حاجه بجد .. عايز افضل كده علي طول .. مش قادر انزل عيني من عليكي "

- " طب ممكن اعرف ايه اللي خلاك تعمل كل ده ؟؟ "

- " انتي عيزاني اشوفك متضايقه و معملش اي حاجه .. دانا موجود في الدنيا دي عشان بس اكون سبب ابتسامتك و سعادتك "

- " انا مينفعش اكون متضايقه و انا بحب واحد زيك "

" انا بس كنت حاسه ان فيه حاجه غلط .. حسيت ان انت مبقتش تحبني .. او مشاعرك قلت .. بس بجد انا غلطانه "

- " انتي فعلا تكوني غلطانه لو فكرتي لحظه ان حبي ليكي ممكن يقل "

" حبك ده هوة اللي مخليني اعيش .. و هوه السبب في كل حاجه جميله حصلتلي في حياتي "

" حبي ليكي ممكن يقل في حاله واحده .. لو حياتي خلصت "

- " بعد الشر عليك يا حبيبي بجد "

قبل يديها و قال لها

- " بعد الشر علينا احنا الاتنين يا حبيبتي "

تمت

*******************

أحمد صبري
29\o5\o9

العلاقه بين شم النسيم و الفسيخ

طبعا زي ماعارفين دايما انا بصلح كل المعلومات الغلط اللي بنا

و زي ما وعدتكم انا جايبلكم النهارده العلاقه بين شم النسيم و الفسيخ

طبعا سمعنا كلام كتير ان الكلام ده عاده فرعونيه

بس مش عارفين التفاصيل ولا الموضوع ده جيه منين

بس انا جايلكم بالتفاصيل

من اول الاسره ال 18 ايام الفراعنه كان بيجي يوم كل سنه

اليوم ده كان فيه عاده ان الستات الفراعين كلهم يخرجوا

و يقضوا يوم براحتهم من غير رجاله او اطفال

يوم براحتهم خالص

اللي عايز بيسين .. ساونا .. جاكوزي .. جيم .. سينما ..اي حاجه كله موجود

يوم بعيد عن قرف البيت و قيود الازواج و شقاوه الاطفال

عشان يشموا نفسهم فيه

و جيه من هنا اسم " شم النسيم "

و المعروف ان الفراعنه كان بيحبوا السمك جدا

و كان الفريزر و التلاجه عندهم علي طول لازم يفضل فيها سمك لحد ما يبوظ او يعفن

ماحدش يسالني ازاي يعفن جوه الثلاجه ..

عادي يعني ايه المشكله .. ثلاجه فرعوني !!

فاللي بيحصل طبعا لما الستات الفراعين بيروحوا يومها يخرجوا

بيسيبوا البيت من غير اكل ..

فالراجل بيضطر يدور في التلاجه لحد ما يلاقي حاجه ياكلها

مش بيلاقي حاجه ياكلها غير السمك اللي عفن جوه الثلاجه

واحد دلوقتي يسالني ..

طب منين جت كلمه " فسيخ " ؟

اللي حصل ان ايام الفراعنه .. من كتر ما السمك بيعفن في الثلاجه

و من كتر تكرار الحادثه بتاعه السمك البايظ دي كل سنه

سموا السمك المعفن ده " سيــــخ "

بحيث الولد الصغير يومها يسال ابوه "هوة فيه ايه يتاكل يا بابا ؟؟ "

يرد الاب عليه و يقول " فيه سيخ "

طبعا علي ما ترجموا الكلام ده من اللغه الفرعونيه للغه العربيه وصلت لكلمه واحده

فســـيــــخ

واحد تاني يسالني ..

طب قدام انت عارف كل حاجه كده .. ايه علاقه الرنجه بالموضوع ؟؟

طبعا يا جماعه بعد ما الراجل وولاده بيضربوا الفسيخ و معاه بصل و كده

بيناموا و مش بيحطوا منطق ولا يدروا بحاجه

تيجي الست من بره و هي معاها الاكل و تقعد ترن الجرس

رينج رينج ( تررن تررن )

و برضه محدش يرد .. و هي جايه بتكون جايبه معاها سمك

السمك اللي هي بتجيبوا ده هوه اللي اطلق عليه لقب " رينجه "

و طبعا جاي اسمه من الرنه بتاعه الجرس اللي الراجل وولاده مش سمعوها

طيب سؤال تاني ..

ايه علاقه شم النسيم بالبيض الملون ؟؟

بصراحه الموضوع ده حيرني كتير

بعد كل الابحاث اللي بحثتها

حسيت ان الموضوع ده مالوش علاقه بالفراعنه لكذا سبب

اولا : ايام الفراعنه ماكانش فيه الوان اصلا عشان يلونوا البيض

ثانيا : ماكانش لسه فيه فراخ اصلا ايام الفراعنه

و اصلا الفراعنه حتي لو كان فيه فراخ و الوان مش هيكونوا فاضيين يلونوا

لو كانت عندهم الوان ليه قعدوا ينقشوا علي الحيطه و يتعبوا نفسيهم

ما كانوا لونوا و ريحوا دماغهم

و لحد هنا انا قلت كل اللي عارفوا عن الموضوع عشان اوصل الصوره كامله

و اصحح المعلومات اللي عندكوا دي

و في انتظار اسائلتكم و تعليقاتكم باذن الله

و كل سنه و انتوا طيبين

و شكرا

أحمد صبري
2o\o4\o9

العلاقه بين عيد الحب و المكرونه

طبعا انا زي مانتوا عارفين

بحب دايما اصلح المعلومات الغلط اللي في دماغنا

و دايما وقتي كله ضايع علي مثل تلك الاشياء

طبعا فيه معلومات خاطئه كلنا عارفنها للاسف

عن يوم عيد الحب العالمي

"Valentine's day "

الفكره اللي محدش عارفها و هي ارتباط عيد الحب بالمكرونه

و هنبدا القصه من الاول

فالانتين كان بيحب واحده طبعا زي ماحنا عارفين

هوة يوم ما قالها بجبك كان يوم 14 فبراير

و هما اعتبروه يوم ليهم هما الاتنين

و بيحتفلوا بيه مع بعض

و كانوا بيحتفلوا بيه مع بعض بانهم بيروحوا ياكلوا مكرونه في اي مطعم

و يجيبوا لبعض دباديب

و فضلوا يحتفلوا بيه مع بعض لحد ما ماتوا

و ابتدي بعد كده الناس كلها تحتفل بيه علي انه عيد الحب العالمي

بس لو نلاحظ ان مفيش حد بياكل مع حبيبته مكرونه الايام دي

و ده للاسف سببه الفتره اللي كانت فيها اضمحلال

الفتره دي كانت تسمي عصر اضمحلال المكرونه

و كانت في الفتره الزمنيه من 1115 الي 1515

و طبعا انتوا عارفين كل حاجه بتتوراثها الاجيال

فالناس طبعا نسيت المكرونه فابتدت الافكار و العادات و التقاليد تنتطلق من غير المكرونه

و بقت الناس بتجيب لبعض هدايا بس في اليوم ده

مع انهم لو فكروا بعقلهم لحظه واحده

و سالوا نفسهم طب ليه اللون الاحمر ؟

ليه مثلا مش بنلبس ازرق يومها و نجيب ورد ازرق؟

اشمعني الاحمر بالذات ؟

و طبعا اجابه السؤال بسيط

لان اللون الاحمر بيتمثل في الصلصه بتاعه المكرونه

طبعا انا الواجب يحتم عليا اني اقولكم المعلومه دي

عشان انا مش بحب تكون منتشره بنا حاجات مش سليمه

و شكرا

أحمد صبري
14\o2\o9

من قمه الفرح الي قمه الحزن

انا بجد كان نفسي من زمان اتكلم عن الموضوع ده
و كتير اوي كنت بقول لا يا صبرور بلاش تنكد علي الناس و انسي و كده
بس بجد قولت لازم احكي عن اللحظات دي
و الفتره اللي عشتها و شوفت فيها بجد لحظات صعبه و لحظات جميله جدا
انا كنت مستني اني اكون كويس و تشوفوني و انا واقف علي رجلي و قادر امشي
و اقف علي رجلي عشان محدش يكتئب او يضايق
و تبقوا شفتوا الوضع الحالي و شايفين انا كنت ايه و بقيت ايه بفضل ربنا سبحانه و تعالي

واحد كان بيحضر فرح اخته ..
و في قمه السعاده عشان اخته بتتجوز و اهله حواليه و فرحان جدا و حواليه اصحابه اللي ميقدرش يعيش من غيرهم
بجد شعور جميل جدا

بعد الفرح انا بصراحه حسيت اني مخنوق شويه
يمكن عشان كنا نازلين من الفرح مش عارف اصحابي راحوا فين
و مش لاقي معظم قرايبي
بجد كانت لحظات غريبه قوي
كان كل واحد راح في حته و ناس خرجت من بوابه غير التانيه
فحسيت بجد بخنقه فظيعه
المهم بعديها كنت قاعد بنقل حاجات من عربيه للتانيه عشان كل واحد يروح معاه حاجته و كده
و لاقيت اصحابي سلمت عليهم
و اتفقنا هنتقابل بعديها بيومين عشان اول يوم دراسه كده و نروح بقي نتشقلب في الجامعه
بعد كده بحوط حاجه في شنطه العربيه و فجاه بجد مادرتش بحاجه !!

انا كل اللي حسيت بيه بعد كده زي بالظبط لما بنشوف في الافلام لما يكون حد مصاب او حاجه و سامع اصوات الناس و شايف صور مهزوزه مش عارف يميزها
و سامع اصوات زي حد يكلم الاسعاف .. ابعدوا يا جماعه عشان الهوا
بجد لبعض الوقت حسيت اني فعلا بحلم .. و ان ده مش واقع ده انا روحت و نمت و بحلم بكده
بس بعد كده ابتديت افهم الموقف شويه و انا داخل جوه عربيه الاسعاف سمعت صوت ماما فطمنتها قولتلها انا كويس يا ماما
انا بس رجلي وجعاني

بصراحه كل اللي حسيت بيه اليوم اللي بعد كده شويه صور مهزوزه او لحظات مش مفهومه بالنسبه ليا
كنت تحت تاثير مخدر عشان العمليات
و كنت كتير اوي بخرف و مش حاسس باللي حواليا .. او بقول كلام كتير مش مفهوم
ماكنتش مركز اوي الفتره دي

انا ابتديت اركز بعديها و افهم اللي حواليا .. فوقت مره من النوم ع الساعه 5:30 الفجر .. لاقيت نفسي نايم علي سرير و مربوط من ايدي و رجلي و حاسس بعطش فظيع
ابتديت اقول اني عطشان و مش قادر
و طبعا مش راضيين يدوني ميا عشان العمليه اللي انا عملتها
فين شويه كده جيه الدكتور قال ممكن يشرب بس مش كتير .. فكانوا بيبلوا قطنه و ينقطعوا في بقي بيها عشان العمليه و كده برضه
المهم طبعا انا كنت حاسس اني كويس .. و ابتديت اتكلم مع الممرضات و كده
و عرفت انهم ربطوني كده عشان انا كنت عمال اشلت فيهم و اضربهم بايدي و رجلي :D :D
ماكنتش اعرف اني مفتري كده xD
المهم الوقت فضل يمشي ببطء اوي .. و اصلا انا جاتلي صدمه ان الزياره بتبدا الساعه 3 الظهر .. يعني انا هقعد كل ده بكلم نفسي . طب عال عال
المهم الورديات اتغيرت و انا كل ده قاعد بتفرج عليهم .. و اشوف الممرضات ( كان فيه 3 فيهم زي القمر اصلا :$ )
بس قشطه يعني و كلهم اصغر مني ..
واحده منهم شكلها صغير كده بقولها انتي عندك كام سنه ؟؟ بتقولي 19 ..
بقولها طب يعني انا اكبر منك بسنتين .. هاتي ميا بقي :D :D :D
بعديها كانوا قاعدين يكتبوا تقرير بتاع اليوم او حاجه .. سمعت وحده منهم بتقول النهارده 13 اكتوبر
انا بجد اتصدمت ساعتها :|
انا اخر يوم كنت دريان فيه كان يوم 9 :| يعني انا كده فيه تلات ايام وقعوا مني و نايم فيهم
اول حاجه فكرت فيها ساعتها امي و ابويا و اختي العروسه دي اللي مالحقتش تفرح
و اكيد جريت ع المستشفي و هي بفستان الفرح
بجد كانوا وحشوني اوي .. و اصحابي كمان وحشوني و كان نفسي اشوفهم اوي
المهم الوقت عدي بطيء قوي .. و كل شويه ابوص ع الساعه عشان اشوف فاضل قد ايه
ببوص حواليا كده لاقيت اني نايم في اوضه كبيره قوي فيها سراير كتير
بس كل الناس اللي نايمين ع السراير مابيتحركوش .. و مش طالعهلهم صوت
عرفت بعد كده تقريبا خير اللهم اجعله خير ان دي العنايه المركزه :D
المهم الدكتور جيه و قال كده ممكن يخرج النهارده .. انا فرحت
بس اكتشفت بعد كده انه قدصه يخرج من العنايه مش من المستشفي :(:(:(
كمان شويه لاقيت بابا كده دخل في الخباثه عشان يطمن عليا و كان واحشني قوي و طمني اني هخرج النهارده
المهم فين و فين بقي علي باليل نزلوني اوضه تانيه
بس للاسف عشان المستشفي كانت حكوميه فكانت الاوضه مشتركه
بس قلت الحمد لله كده احسن من الاموات اللي كنت قاعد معاهم فوق :D



انا طبعا لحد دلوقتي لسه معرفش انا حالتي ايه ولا جرالي ايه
بس كنت حاسس بالم شويه في رجلي الشمال .. و كانوا قافلين علي رجلي اليمين كده بحديده ماسكه من اول الرجل خالص لحد القدم
انا الاول كنت فاكره جبس اصلا بس فهمت بعد كده ان كان فيه مشكله في العضم و ده لابسه عشان يمسك الرجل في بعضها
كنت بصراحه مش قادر اشوف منظر رجلي .. علي طول متغطي و نايم و مش قادر اوطي براسي اشوفها
بس في مره بصيت علي رجلي الشمال و عرفت انها اتبترت
ساعتها بجد الحمد لله و الشكر لله
و مزعلتش و قلت اكيد ربنا ليه حكمه في كده .. و ربنا ليه حكمه اني لسه عايش و ماجراليش حاجه
ان ربنا اداني فرصه تانيه احسن بيها حياتي
كنت ممكن اموت خالص اصلا
هما كانوا طول الفتره دي بيحاولوا يجبولي دكتور عشان يقولي الخبر بطريقته
دكتور نفساني او حاجه .. و كان اسلوبه غريب قوي
بدل ما يقولي ان انت رجلك خلاص بس الحمد لله التانيه دي هتكون سليمه و ان شاء الله هتكون كويس
لا ده قالي انت مش هتعرف تمشي تاني خلاص و قول الحمد لله كان ممكن كمان دراعك يروح :| :S :S
هوه يمكن اسلوبه انه يقول الحاجه الاصعب عشان لما اشوف الابسط اقول الحمد لله
بس بجد الراجل ده دمر اعصابي
بس هما ادوني ساعتها مهدئ الحمد لله و خلاص الموضوع خلص علي خير



الفتره اللي بعد كده اللي بدات بقي افهم الموقف و حالتي لما بابا قعدي يحكلي اللي مريت بيه
و البتر حصل ازاي و العمليات اللي عملتها
بجد حسيت اني بقيت احسن من الاول
كنت فرحااااااااااان جدا
بجد اول مره اعرف ان اصحابي بيحبوني الحب ده كله
بجد كانوا دايما جنبي و ماسبونيش لحظه
كانوا معايا و اهلي كلهم كانوا ملمومين حواليا
بجد انا فرحت جدا بده
شوفت ناس بقالي سنين ما شوفتهمش
و فيه ناس اصحابي بقالنا زمن بنحاول نتقابل و نشوف بعض لحد ما فقدنا الامل اننا نشوف بعض لقيتهم بجد جنبي و حواليا

انا بجد شايف ان اللي انا فيه ده نعمه من نعم ربنا
انا بجد الحادثه دي غيرت حاجات كتير في حياتي
الحمد لله للاحسن
بجد احمدك و اشكر فضلك يا رب
و بجد بفضله انا دلوقتي بقدر امشي و هكون احسن و احسن باذنه
و بشكره بجد علي الابتلاء ده
لانه عرفني معاني حاجات كتير قوي ما كنتش عارفها
بجد احمدك و اشكر فضلك يا رب

معلش لو نكدت او طولت عليكوا
بس بجد كنت حابب انكوا تعرفوا انا حسيت بايه و عايز اشارككم ده
شكرا يا احلي اصحاب في الدنيا
بحبكواااااااااااااا

أحمد صبري
24\o1\o1o