يااااااااااااااااااااااه .. البلوج بتاعي .. دانا كنت ناسي اصلًا ان عندي بلوج
وحشني اوي شكله و كمان وحشتني الكتابه فيه
طب ما قشطه بقي يالا نكتب حاجه كده
كتير من اصحابي قالولي يا صبرور انت مش بتكتب ليه ؟؟
وحشتنا الحاجات اللي بتكتبها
بصيت كده لاقيت ان فعلا اخر حاجه كتبتها كانت من سنه 2010
يااااااااااااه
زمان قوي
يمكن فيه حاجات كتير اتغيرت في حياتي من ساعتها .. و فيه تطورات جديده في حياتي الشخصيه
يمكن عشان بعديها بكام يوم من اخر بوست بدات مع الانسانه اللي قلبي اختارها حياه جديده
و ملت فراغ كبيرجوايا كان هو سبب اني بكتب
مانكرش انه ممكن ده يكون سبب
لانها فعلًا قلبت حياتي .. للأجمل طبعا " ايموشن مكسوف " .. و غيرت فيها حاجات كتير
و ربنا يخليها ليها
و فيه حاجات تانيه حصلت في الفتره اللي بعديها غريبه
بعديها بكام يوم حصلت ثوره تونس اللي خلتنا مش مصدقين اللي احنا بنشوفه قدام عينينا
و قعدنا نقول ليه مصر مش زي تونس .. و بسم الله الرحمن الرحيم الاجابه تونس
و حصلت بعد كده ثوره 25 يناير
اكبر ثوره في العالم ربنا خلق ناس معارضين ليها اكتر من مؤيدينها
الثوره اللي خلتنا ننطق و نتكلم و نقول و نعبر و نعمل كل حاجه نفسنا فيها
بس برضه خلتنا نحس بالياس
زي اللي انا بقيت بحسه دلوقتي بسبب الاحداث اللي بتحصل
بسبب الناس اللي مش فاهمه .. و اللي مش عايز تفهم
الناس اللي دماغها قافشه في حته و مش عايزها تحكم ضميرها
الاول كنت بقول الناس دي مش عندها ضمير .. مش فاهمه .. بهايم
بس بعد كده قلت اللوم مش عليها
اللوم علي اللي خلاهم كده
النظام اللي هو السبب في انهم يكونوا كده
و هيفضلوا كده طول مالنظام ده موجود و لسه عايش معانا
لو كل واحد من دول حكم عقله و شاف و سمع و قارن بين الاحداث بتاعه دلوقتي و زمان
هيعرف بجد يفهم الصوره بتاعه دلوقتي و يفهمها و يلاحظ اللي بيحصل حواله
كل اللي احنا عايزينه من الناس دي حبه عقل
حته قد كده اهو
و الله ناس كتير هتستريح و هتفهم
انا مش عايز اتكلم في وضع سياسي بعينه ولا احلل موقف ولا اي حاجه
انا عايز الناس بس تحاول انها تفهم
ما تقفلش دماغها ..
و برضه ماتشطحش بدماغها اوي عشان احنا مش حمل 80 مليون توفيق عكاشه جديد
لازم تقغد و تعمل واقفه مع نفسك
و تشوف و تحلل و تسمع الكلام اللي كان بيتقال وقت الثوره
و تشوف الفيديوز بتاعه زمان و تقارنها بين الفيديوز بتاعه دلوقتي
صدقني ساعتها هتعرف الصح فين
و هتعرف تحكم عقلك كويس قوي
و تعرف راسك من رجليك
**الزتونه**
لازم نشوف و نسمع و نفهم
عشان محدش يعرف يضحك عليك بكلمتين مالهومش معني
و يركب ناس بريئه الغلط
و حاجه كمان
انا رجعت اكتب تاني
عوده حميده .. ان شاء الله
أحمد صبري
21-12-2011
