فكرت كتير اوي تبدا البلوج بايه يا واد يا صبرور
قلت اتكلم علي المرور
طب ما هي خربانه خربانه
قشطه اتكلم علي اللي بيحصل للبنات في الشارع من معاكسات و الذي منه
يا عم هوة انت هتصلح الكون
نتكلم عن الحاجات اللي بتحصلنا كل يوم في حياتنا و احنا ماشيين في الشارع و البهدله اللي بتحصل
يا سيدي طب ما كلنا شايفين ده و مستحملينه
طب اتكلم علي ايه ؟؟ اتكلم علي ايه ؟؟
مفيش غير اني اتكلم علي
LOST
طبعا كل اللي يعرفوني عارفين قد ايه انا معجب بالمسلسل ده و ده ايه عايش معاه اجمل قصه حب في حياتي
بس الفكره ان فيه ناس مش فاهمين ليه كده ؟؟
و طبعا بسمع شويه تعليقات لذيذه جدا من الناس
ده طلع نزل يا عم مسلسل
يا عم قعد ذاكرلك كلمتين
اقرالك كتاب ينفعك
لوست ايه اللي انت جاي تقول عليه
مش دول شويه ناس وقعوا علي جزيره و مش عارفين يرجعوا ازاي
و مش فاهمين حاجه و بيقولوا كده و خلاص
مع ان اغلب اللي قالولي كده ييشوفه مسلسلات و بيقعدوا يتفرجوا عليها كل يوم
و المسلسلات دي بتكون من النوع السخيف
اللي لما يكون قصير يكون 43 حلقه
و الاحداث بتكون كالاتي
و في اخر المسلسل "محسن" اللي كان مرتشي بيدخل السجن بعد ما "سوسن" بتجيب المستندات اللي بتدينه بيها
اللي قعدت 40 حلقه بتحاول تجيبهم
بعد ماختها "نوال" اتجوزت عرفي من "تامر " اللي بتحبه في الجامعه و ضحك عليها و سابها
و اخوها " هشام " اتقبض عليه عشان انضم لجماعات ارهابيه
و في نفس الوقت "مصطفي الحسيني " ابوهم الراجل الكباره اتجوز السكرتيره بتاعته "باكينام "
بعد جواز لامهم "عفت " دام اكتر من 20 سنه
و في نفس الوقت طبعا المسلسل بيركز جدا علي اصحاب نوال "يسريه " و "خديجه " اللي قعدوا ينصحوها تبعد
عن " تامر" عشان ده بيلعب بمشاعرها
و تلاقي "يسريه " بتحب "اكرم" جدا بس هي عارفه ان " اكرم" ده معيد في الجامعه و مستحيل يكون زي
تامر" المستهتر ده "
و" خديجه " طبعا طالعه السما عشان "عامر" عمره ما نسي الفلانتاين
و علي طول لازم يجبالها هدايا و اصلا
هنلاقي ان "خديجه" هي اللي معرفه "نوال "علي "تامر" اصلا
بس هنعمل ايه في الطباع اللي بتتغير في البشر بقي
و طبعا طول المسلسل "هشام" ( بتاع الجامعات الارهابيه انتوا نسيتوا ولا ايه ) بيحاول ازاي يقاوم الفساد اللي في المجتمع
و مش عاجبه اللبس اللي لبساه اخته" نوال" عشان ده بيظهر مفاتنها و ربنك حليم ستار
و عايز يجوزها لزميله في الخليه "عباس " و هوة شاب تقي بيصرف علي ابوه العاجز و امه اللي عندها تلات ولاد غير طبعا ولاد الحاره
و في نفس الوقت " يسريه" ( اللي بتحب اكرم يا جماعه .. صاحبه نوال ) اخوها "وليد" في ثانويه عامه
و امه عيزاه يدخل طب عشان يطلع ظابط مهندس قد الدنيا و تفتخر بيه
و الواد اصلا مش في دماغه و لازم يطلع ليه اصحاب عايزينه يدمن و يشرب سجاير
و بيتحول في ثانيه"وليد" الي مدمن درجه اولي و السواد تحت عينيه قد كده
و في نفس الوقت " اكرم" يشوفه مره و يتخانق مع " يسريه" عشان مش واخده بالها من اخوها
و انه مش هينفع يرتبط بواحده اخوها مدمن
الخ الخ الخ
ميه و خمسين مسلسل في السنه نفس الفكره و نفس الاحداث
مفيش جديد .. مفيش تعيير غير للاسماء
نفس القضايا بنفس الاسلوب العجيب و العقيم في تصويرها و عرضها
و الناس برضه مصممين يشوفه الكلام ده
و كل يوم يجروا ملهوفين علي يشوفوه المسلسل
و لما اجي اتكلم علي
LOST
ابقي انا غلطان و صفيق و فاضي و مش ورايا حاجه و بضيع وقتي
انا طبعا لسه قدامي كلام كتير عايز اقوله عن الموضوع ده
بس انا هكتفي بكده لحد ماشوف رد فعلكوا و هي عايزيني استمر في الموضوع ولا لا
و شكرا ليكوا كلكوا
أحمد صبري
27 / o7 / o9
